Zioen azalpena.

Euskal Autonomia Erkidegoak eskumen esklusiboa du kirol arloan, Autonomia Estatuko 10.36 artikuluan jasotzen denez. Bestalde, Lurralde Historikoen 27/1983 Legeak foru organoei ematen die erkidego osorako erakundeek emandako arauak garatu eta gauzatzea ondoko arlo honetan: “Kirolaren sustapena. Eskola kiroleko eta kirola guztiontzako programak ” arloan.

Ekainaren 11n eman zen Euskadiko kirolaren 14/1998 Legeak honela definitzen du eskola kirola: “ikasleek nahitaezko eskolatze aldian irakasteko orduetatik kanpo egiten duten kirol jarduera antolatua” eta ondokoa seinalatzen du, era berean: “eskola kirolean, ahal dela, kirol anitz praktikatuko da eta lehiaketa kirola ez da izango helburu bakarra. Horrela, ikasle guztiek hainbat kirol mota ezagutu eta horietan aritzea lortu nahi da, zeinek bere borondate, gaitasun fisiko eta adinaren arabera ”.

Gainera, otsailaren 18ko 3/2005 Legeak, haurrak eta nerabeak zaintzeko eta babestekoak, astialdi aktiborako duten eskubideari dagokionez, ondokoa ezartzen du: “haurrek eta nerabeek eskubidea dute kirolak eta jarduera fisikoak egiteko, eta saihestu egin behar da jarduera horietan lehiakortasuna lehenbiziko baliotzat sustatzea. Lehiaketa kiroletan parte hartzea borondatezkoa izan beharko da, beti, eta entrenamendu plan eta metodoek errespetatu egin beharko dituzte haien egoera fisikoa eta hezkuntza beharrizanak ”.

Bide horretan bertan, esan dezakegu adierazpen, akordio eta proiektu ugarik erakusten dutela eskoletako umeen jarduera fisikoaren eta kirolaren garrantzia. Horien artean, ondokoak aipa ditzakegu:

• Nizako Tratatuak (2000. urtea) ezartzen du kirolari gazteak babestu egin behar direla, batez ere beren heziketari eta lanbide prestakuntzari begiratuz. Europar Legebiltzarrak 2004. urtea Kirolaren bidezko Heziketaren Europar Urte deklaratu zuen.
  



• NBEko Batzar Nagusiak (2003. urtea) “heziketa, osasuna, garapena eta bakea sustatzeko bitartekotzat hartzen du kirola”. Ebazpen hori betetzeko NBEko idazkari nagusiak (2004. urtea) Heziketa Fisikoaren eta Kirolaren Nazioarteko Urtea aurkeztu zuen.
  
  
• Osasunaren Munduko Batzarrak (2004. urtea) Elikadurari, Jarduera Fisikoari eta Osasunari buruzko Mundu Estrategia onartu zuen, beste batzuen artean, ondoko helburu hau zuela: “gaizki elikatzeak eta jarduera fisikorik ez egiteak dakartzan erikortasun eta hilkortasuna murriztea”. Adierazpen horren ondorioz, Estatuko Gobernuaren Osasun eta Kontsumo Ministerioak, autonomia erkidego guztien lankidetzarekin, NAOS estrategia landu du eta hor bultzatu nahi da “jarduera fisikoa eta kirola sarri egitea ikastetxean, eskoletako kiroldegiak erabiltzeko ordutegia zabalduz asteburuetako kirol jarduera programak egiteko, umeak ikastetxera oinez edo bizikletan joan daitezela sustatuz, kirolari buruzko lantegietan parte hartzeko kirolariekin harremanetan jarriz, etab.”
  
  
• 2003-2007 aldiko Kirolaren Euskal Planaren helburu estrategikoa ondokoa da: “Euskadirako bertarako kirol eredua garatzea, euskal herritarren bizitza aberastu eta bere kirol ibilbiderako “aukera” emango duena” eta planak bere lehenbiziko lerro estrategikotzat ESKOLA KIROLA hartzen du, eta helburua ondokoa da: “haur kirolarien hezkuntza garapena osatzeko eta kirolari bakoitzaren beharrak asetzeko Eskola Kiroleko Eredua zehaztea”.
  
  
• Azkenik, 2004ko abenduaren 11 eta 12an, Araba, Bizkaia eta Gipuzkoako ikastetxeetako 13 eta 14 urteko ehun bat ume Donostian elkartu ziren eskola kirolari buruz eztabaidatzeko. Bilera horren emaitza Eskola Kirolaren manifestua izan da, eskola kirolean partehartzaile nagusi direnen nahiak eta asmoak bilduz.

Horren ondorioz eta zioen azalpeneko edukien arabera eta,

KONTUAN HARTUZ,

• Eskola Kirola Kirolaren Euskal Sistemaren oinarri dela eta, horren ondorioz Gipuzkoako kirol sistemarena, unibertsaltasun printzipioa onetsiz eredu propioan oinarrituta, eskoletako ikasle guztiak bertan biltzeko.
  
  
• Ereduak helburu nagusitzat kirol kultur iraunkorra ezartzea duela eskoletako umeen artean, kirol modalitate ezberdinak ezagutuz eta lehiaketa bidez edo jolasaren bidez praktikatuz, bakoitzak duen borondate, gaitasun fisiko eta osasuna kontuan hartuz, eta eskoletako ikasle ezinduen integrazioari jaramon handia eginez.
  
  
• Erakundeek ume eta gazteen osotasuna zaintzeko betebeharra dutela, pertsonarengan zentratutako eta gizatiarragoak egiteko potentzialtasun guztiak garatuko dituen kirola eskainiz.
  
  
• Ume eta gazteen heziketa integralaren alde egin behar duela eskola kirolak, hezkuntza prozesu orokorra osatzeko berebiziko jarduera delako, batez ere bizi ohitura osasungarriak sortzeari dagokionez.
  
  
• Eredua integrala eta integratzailea dela.Integrala, kirolak eta jarduera fisikoak egiteko eskaintza posibilitate guztiak hartzen dituelako, eta, integratzailea, eskolako adinekoekin zerikusi duten gizarte agente guztien lankidetzaren bidez egituratzen delako: herri administrazio, ikastetxe eta kirol federazio eta kluben bidez.

Eskola Kirolaren manifestuari atxikitzea, hiru lurraldeetako ikastetxeetako umeek, Donostian 2004ko abenduaren 11 eta 12an egindako Euskadiko Eskola Kirolari buruzko I. Kongresuan egin eta onartu zuten manifestuari.

Adierazpenaren edukia