Sarrera >> Orientazio pedagogiko-didaktikoak
- JOKALARIEN INTERES ETA MOTIBAZIOETATIK
ABIATU
- Iruzkina:
Entrenamenduetan irakasten ditugun oinarrien edukiek bat etorri behar dute
jokalarien interesekin. Ez dugu pentsatu behar jokalariak beti prest daudenik
guk komenigarritzat jotzen duguna ikasteko; horregatik da beharrezkoa irakasten
ari garenarekiko interesa eta gogoa piztea.
Entrenamendurako orientabideak:
- Entrenamenduen edukia jokalariaren jakite-mailari
eta ahalmenari egokitu behar diogu.
- Adore eman behar diegu neska-mutilei, jokoan eraginkor eta lehiakor
senti daitezen.
- Egiten dituzten akatsen gaineko informazio zehatza eta erabilgarria
eman behar diegu.
- Entrenatzailearen esanak ulermenera eta gauzak ongi egitera bideratuago
egon behar dute emaitza lehiakorra izatera baino.
- Jokalarien interesekin bat datozen edukiak aurkeztu
behar ditugu entrenamenduan, nahi dugun portaerak indartze aldera, agertzen
badira behintzat; betiere iradoki egin behar dugu, ez aurpegiratu, eta
jokalariaren portaerari/ekintzari jarri behar diogu arreta, eta ez emaitzari.
Entrenamenduko zeregin batean, jokalari batek aukera argia izan eta gola sartzen
ez badu, ez diogu "Hori sartu egin behar da" esango. Egin duenaren
gainean orientatzen saiatuko gara, bere ekintzari errepara diezaion eta ez
emaitzari; izan ere, emaitzari erreparatzeak antsietatea eragin liezaioke,
eta horrek huts egiteko beldurra ekar lezake. Ekintzari jarri behar diogu arreta,
ez emaitzari.
