Ariketen helburuak adierazitako zatikatzearen azken mailan kokatuko dira, hots, formulatutako helburuak oso zehatzak izan behar dute (zehaztasun maila gorena). Bataz beste, ordubeteko saioak direla kontuan izanda, 5 edo 6 ariketa burutuko dira gehienez. Ariketa bakoitzeko helburu bakarra formulatzeak ariketaren eraginkortasuna eta begiralearen kontrol maila areagotuko du. Kasu honetan ere, ariketa guztien helburuak ez dira saiokoen menpe egongo, beste helburu batzuk landu ahal izango dira, baina portzentai txikiagoan (gehienez 6tik 2 ariketa). Aurreko adibideari helduz gero, 2. aldiko 1. ikasturteko 5. hilabeteko 1. saioko ariketen helburuak ondorengoak dira:

• 1. ariketaren helburua: antzerako egitura duen jazarpen jokoaren bidez kidearekin kolaboratzeko modu ezberdinak erabili.
• 2. ariketaren helburua: kolaborazio egoeran aireko goiko kolpea erabiliz pilota txapa gaineko ezkerreko gunera bideratzeko gai izan.
• 3. ariketaren helburua: pilota hartu eta frontisera jaurti ondoren joz, 1:1 egoeran tantoa kantxako aurrealdeko eta atzealdeko eremuetara bideratu.
• 4. ariketaren helburua: kolaborazio egoeran aireko goiko kolpea erabiliz pilota txapa gaineko ezker eta eskuineko uztaietara bideratu.
• 5. ariketaren helburua: pilota hartu, frontisera jaurti eta punpa ondoren joz, 1:1 egoeran pilota kantxako ezkerraldeko eta eskuinaldeko eremuetara bideratu.
• 6. ariketaren helburua: kantxako gune ezberdinetatik pilota frontisera bideratu.