Puntu honetan adieraziko ditugun sailkapenak guk zehaztutako irizpideen araberakoak dira. Sailkapen hauen helburua da ariketak sortzeko baliabideak aberastea. Adibidez, ariketa batean kolpea punpa ondoren burutu ordez airez eginez gero, beste ariketa ezberdin bat sor daiteke, nahiz eta hasierako helburua ez aldatu (ariketa beraren aldaera bat izango da).

Aldaera gehiegi egitea bezain txarra da ariketa bera askotan errepikatzea. Hau da, saio batean landuriko ariketa batzuk hurrengo saioan ere errepikatzea garrantzitsua da eta, era berean, ikasleentzat ariketa bat edo bi berriak (edo aldaerak) sartzea aberasgarria eta dibertigarria izango da.

Honela, jarraian adieraziko ditugun atalek aldietan zehaztutako eskemaren ordena berbera izango dute: lehenengo jotzen duenaren inguruko sailkapenak, eta ondoren, jotzen ez duenaren ingurukoak. Gogoratu bi egoera horiek jokoan aldi berean gertatzen direla; eta beraz, ariketa askotan biak elkarrekin nahastea komenigarria da.

Jotzen duenaren inguruko sailkapena

Punparen altuera irudia
+ Goranzko ibilbidea: pilotak punparen ondoren altuera gorena lortu arteko aldia. + Altuera gorena: pilotak punparen ondoren gorantz egin eta norabidea aldatzen duen unea. + Beheranzko ibilbidea: pilotak punpa egin eta altuera gorena lortzen duenetik lurra jo arteko aldia.
Kolpe mota
+ Punpaz: kolpearen aurretik pilotak lurrean punpa egitean. + Airez: frontisetik zuzenean datorren pilota punpa egin aurretik jotzean.
Erabilitako eskua
+ Eskuinez + Ezkerrez
Kolpearen altuera
+ Goikoa: besaburuen gainetik egindako kolpea. + Erdikoa: aldaka eta besaburuen artean egindako kolpea. + Behekoa (azpikoa): lurra eta aldakaren artean egindako kolpea.
Efektuak
+ Kolpe laua: pilotari efekturik ematen ez zaionean. + Goranzko efektua: eskuarekin pilota ukitzeko unean, eskuak goranzko ibilbidea egitean. + Beheranzko efektua: eskuarekin pilota ukitzeko unean, eskuak beheranzko ibilbidea egitean.
Pilotaren ibilbidea
+ Zuzena: kolpea egin eta frontisaren arteko ibilbideak lerro zuzena osatzean. + Loratua: kolpea egin eta frontisaren arteko ibilbidea lerromakurra denean.
Pilotari emaniko indarra
+ Indartsu (fuerte): pilotari abiadura handia ematen zaionean. + Suabe: pilotari abiadura txikia ematen zaionean.
Norabidea (espazio-helburuak)
+ 1. espazio-helburua: frontiseko gunea. + 2. espazio-helburua: zoruko gunea (kantxa). + 3. espazio-helburua: ezker horma, errebotea eta kontrakantxako gunea (espazio finkoa) eta aurkariaren araberako espazioa (espazio mugikorra).

Jotzen ez duenaren inguruko sailkapena

Betetzen duen espazioa
+ Luzerako ardatza: frontisa eta errebotearen arteko ardatza. + Zabalerako ardatza: ezker horma eta kontrakantxaren arteko ardatza.
Jotzailearen araberako egoera [1]
+ Ezker-aurretik: jotzen ez duena kolpea jotzen duenaren ezkerrean, aurretik, kokatuko da. + Ezker-atzetik: jotzen ez duena kolpea jotzen duenaren ezkerrean, atzetik, kokatuko da. + Eskuin-aurretik: jotzen ez duena kolpea jotzen duenaren eskuinean, atzetik, kokatuko da. + Eskuin-atzetik: jotzen ez duena kolpea jotzen duenaren eskuinean, atzetik, kokatuko da.

[1] Aurkariak binaka jardutean, egoera hauek aberatsagoak izango dira.